RSS

You are here

Adikhardili utsavuni akademia sebepi Maškharthemutno dive Romengo

Utsavuna akademia "Roma prekal šelberšutnipe", ani organizacia Koordinaciako trupo vaš dikhlaripe realizacia Strategiako vaš socialno inkluzia Romengo thaj Romanicengo ani Republika Srbia vaš periodi kotar 2016- 2025. berš, Kancelaria vaš inkluzia Romegi thaj amalipe "Romag", uzo devipedumo projektesko Germaniako barjaripasko maškharipe (GIZ), adikhardilo 8.aprili Maškharthemutno dive Romengo ano Srbikano themutno teatari ano Novi Sadi.

 

Bahtaripe festa sa Romenge, presidento Krainako thagarutnako Igor Mirović phendja kaj akaja data sitoj šansa kaj saren amen te pučlarahape so amen sar amalipe kerdjam vaš amare dizutne thaj komšije. 

 

Javerutno presidentkako Koordinaciako trupesko vaš dikhlaripe realizacia Strategiako, save preseduinela telopresidentka Thagarutnaki, prof.dr Zorana Mihajlović, dr Nenad Ivanišević, phendja kaj numa kupate bukja šaj te ušarahape rezultatjenca thaj te anglunisara pašloipe thaj dživdipe Romango thaj Romanicengo.

 

Krainaki senatorka Jelena Jovanović naisardja  e Republika Srbiake thaj Krainaka thagarutnake pedo sa programja thaj projektja save realizuinena kana sito ano pučipe pošukharipe pašloipe romana nacionalno kupatnako. 

 

Uzo dženutne romana kupatnako, ani manifestacia lele kotor ini reprezentatorja kotar diplomatjengo kori, Krainaki thagarutni, resorno ministribja thaj krainake sekretariatja. 

 

Maškharthemutno dive Romengo sito dive vaš barjaripe romana kulturako, ama ini vazdipe džandipasko kotar problemja savenca Roma Thaj Romnja sakodive maladinenape.  

 

Programi lelape kotar romani himna"Dželem, dželem", a uzo  muzikako kotor sine ini narativi kotar istoria, kultura thaj adetja Romengo ano amare thanutnipe. Angluno drom ano leparnipe Maškharthemutno dive Romengo gilavdile numere kotar klasikano keripe e dominatno romana tematika, sar so siton: "Karmen", "Monti čardaš", "Bolero","Sarasate","Toreador" thaj aver.