RSS

You are here

I Мihajlovićka: Agorisipe Koridori 10 bari vidžai Srbiaki

I Telopresidentka Thagarutni Srbiaki thaj ministarka vaš lačaripe, dromutnipe thaj infrastruktura, prof. dr Zorana Mihajlović, phendja avidive kaj dromutnipe po auto-drom prekal Grdelicaki klisura ka ovol mukhlo ani savatone,18 majea, savea palo 30 berš praktikano agorisinelape lačaripe Koridori 10.

 

 “Ano savatone putara sa mesmerrigako phak Koridori 10, veke na ka nakholpe magistralno drome, već numa auto-dromea, savea sikhavdjam kaj šaj te agorisina jekh adžahar baro projekti. Odova sito bari vidžai vaš Srbia thaj vidžai sa inžinjerengo thaj bučarnengo save kerde buti pedo lačaripe Koridori 10 thaj siole baro semnipe vaš regionalno phandipe Srbiako", phendja i Mihajlovićka ano  detharinesko programi RTS-esko.

 

Voj phendja kaj dizutne Srbiake kotar savatone šaj ini pašarde te dikhen kotar savo lačarimasko keripe vakharlape kana džana prekal Grdelicaki klisura."Ano odola deonice čhivdilo 250.000 tojna asfalti, cidisalo 650.000 kubikja bar, kerdile duj tunelja thaj 33 purtja, ano odova ini duj majuče purtja ani Srbia, cidisale ano aver than sastrnalutno drom thaj lejnako balaja vaš te lačarolpe auto-drom", phendja voj.

 

Prekal nilaj, sar voj phenla, ka mukhelpe ano dromutnipe ini deonice so ačile ano javinutnorigako phak Koridori 10, vaš Bugaria, sar ini auto-drom kotar Obrenovaci dži Preljina.

 

Voj phendja kaj ano paraštuj, 17 majea, ano 12 sati, ano savo ka ovol ini presidento Srbiako ka lenpe bukja pedo lačaripe deonica kotar Preljina dži Požega ano Koridori 11, so sito jekh kotar trin neve auto-dromja save lenape te lačarenpe ano akava nilaj.

 

 “Ano pučipe sitoj deonica molipa paše 500 milijojna evrja, adžahar rodutni vaš lačaripe, soske jekh trituni trasa siton purtja thaj tunelja, maškhar save ka ovol ini tuneli savo ka ovol po lungo kotar odola ani Grdelicaki klisura", phendja i Mihajlovićka.

 

Voj pana phendja kaj ano nilaj planirimo leipe bukjengo ano pana duj auto-dromja save siton kotor neve investiciako ciklusesko: Moravsko koridori, jase auto-drom Pojate-Preljina, thaj deonica auto-drom Beogard-Sarajevo kotar Sremeski Rača dži Kuzmin.