RSS

You are here

I Mihajlovićka: Edukacia thaj bešipe ano khera klidutne vaš pošukhar pašloipe Romengo thaj Romnjengo

"Kerdjam disave adamja kana sitoj ano pučipe inkluzia Romengi thaj Romnjengi ano amalipe, po ulavdipe ani umal bešipe ano khera, ama musaj te ova but po efikasno ano lokalno niveli, te kera šartja e dženutnenge romana kupatnake te školuinenpe thaj te khuven pi buti. Numa te sine kaj agorisinena škola šaj ini te arakhen buti thaj te cidenpe kotar mahala", phendja avdive telopresidentka Thagarutna Srbiaki prof. dr Zorana Mihajlović.

 

I Mihajlovićka, save preseduinela Thagarutnake Koordinaciake trupoa vaš dikhlaripe realizacia Strategiako vaš socialno inkluzia Romengi thaj Romnjengi ani Srbia, phendja kaj Srbia numa jekh raštra ano regioni kaj akava pučipe čhivgja ano majučo niveli.

 

"Kupate koordinirina raštrake thaj lokalno institucie, ama paše kera buti ini sa maškharthemutne partnerjenca - OEBS-ea, Khedutne nacienca, Konsili Evropako, ama ini e civilno sektorea, soske numa kupate šaj te kera jekh realno adamo ani inkluzia Romengi. Hakaj pedi edukacia, bešipe ano khera thaj sastipasko dikhlaripe fundone siton manušikane hakaja sakole dizutnesko akala phuvjako, bi dikhipa pedo nacionalnipe", phendja voj.

 

I Mihajlovićka, putariba Regionalno konferencia savi sine vaš Dekada inkluzia Romengi, phendja kaj raštra sitoj akate te kerol šartja vaš labdardi inkluzia, prekal kanunuja thaj strategiake dokumentja, ama odova procesi nane agorisimo, soske kaj romani kupatni sakodive malavdinelpe e stereotipjenca thaj diskriminacia.

 

"Šaj te phenav pana kaj akaja dekada Romengi thaj Romnjengi, ma te bisatara pedo džuvlja soske on siton majhačardi grupa. Musaj te kera saren kupate  pobut vaš te pašova olenge, te hačaren kaj amen marahape opipe stereotipja thaj kaj nane dizutne dujto rndosko", phendja voj.

 

I Mihajlovićka pana phendja kaj ano umal bešipe ano khera realizuinelape IPA projekti molipa 9,6 milijojna evrja thaj kaj 700 Roma thaj Romnja, kotar odova 250 čhavore, agorisindja pučipe poro bešipasko, kaj vakharelape e nevo IPA programi molipa 20 milijojna evrja, sar ini kaj sajti Ministribasko vaš lačaripe, dromutnipe thaj infrastruktura nakhavdo ini pi romani čhib.

 

O Zoran Djordjević, ministri vaš buti, khuvipe pi buti, mardutnengo thaj socialno pučipe, phendja kaj reso Thagarutna Srbiako kaj pašloipe romana kupatnako te lačarolpe thaj kaj Thagarutni akava pučipe vazdindja ano niveli telopresidentkako.

 

"Barikano sim po odova so Roma siton dizutne Srbiake, si but thanutnipe vaš anglunipe, cida pala amende recidivi nakhlo vakhtesko, kana akala tema khonik na astardope. Koordinaciako trupo thaj Ministribe siton akate kaj kupatne bukja resenape konkretikane napja vaš romani kupatni te hačarol šukharipe", phendja vov.

 

O Andrea Oricio,šefi misiako OEBS ani Srbia, phendja kaj socialno inkluzia romana populaciako semni tema ani sa Evropa thaj kaj OEBS ka lungarol te dol dumo Thagarutna Srbiake ano odova procesi.

 

"Kupate sito klidutno svato. Amari misia thaj reso siton uluvipe manušikane hakaja, a romani kupatni sitoj jekh odolenda savi sakodive malavdinelape e but gendune zumavipa thaj diskriminacia. Po ulavdipe sito semno inkluzia ani edukacia thaj khuvipe pi buti, sar ini pašloipe Romnjengo thaj olengo leipe kotor ano publikako dživdipe", phendja o Oricio.

 

O Muzafer Bajram, ministri bi portfelji ani Thagarutni Šudrorigaki Makedonia phendja kaj socialno inkluzia Romengi lungovakhtesko thaj saastardutno procesi ano savo musaj te len kotor sa akterja ano amalipe.

 

"Manga te lačara multikulturno amalipe, uzo labaripe standardja thaj rekomondacie Evropaka uniake. Te sine kaj čačikane manga te tiknara horipe savo si maškhar amare dizutne romane nacionalnipaske thaj sa aver, manglape pherdi devipe ani buti sa faktorjengo ano amalipe", phendja vov.

 

 O Orhan Usein kotar Konsili vaš regionalno maškharipe phendja kaj avdisutni konferencia šaj te ovol  sar lepardutni vaš siklile lekcie - so dži akana kerdjam, a so pana ačhola.

 

"Akava sito semno kedipe, savo amenge ka dol direktive vaš podur politike ani akaja umal. Nais Thagarutna Srbiake pedo olako angažuipe thaj buti vaš labdardi integracia Romengi thaj Romnjengi ano amalipe", phendja o Usein.