RSS

You are here

I Mihajlovićka: Коridori 10, agorsimo, phagardili ini Grdelica

„Grdelicaki klisura sa phaglardili, mesmerrigako phak Koridori 10 vaš Šudrorigaki Makedonia thaj Grecia kompletno si gata thaj ano phandipe kotar vakhteske čhinavdipe ano deš dive save avena ka ovol lošalipa putardo vaš dromutnipe", phendja ano detharin telopresidentka Thagarutna Srbiaki thaj ministarka vaš lačaripe, dromutnipe thaj infrastruktura, prof. dr Zorana Mihajlović.

 

Voj vaš detharinengo programi TV Prva direktno kotar poro kabineti phendja kaj pedo Koridori 10 adžukhardilo majhari 30 berš, kaj akana agorisalilo thaj majbut dikhlardilo arakhipe dromutnipasko.  

 

„Ano pučipe sito majpharo lačardimasko than ani Evropa, ani deonica kotar 26,3 km sijamen 33 purtja, maškhar olende ini majučo Vrla, sar ini duj majlunge tunelja Predejane thaj Manajle. Bari buti kerdili, cidindjam thanesta magistralno drom, cidindjam 600.000 kubiko bar, pala amende  ačile bare bukja thaj me sim barikani pedo sa bučarne   save lele kotor ano lačaripe Koridori 10. Veke nane te cidolpe kotar auto-drom pedo magistralno drom, so ka ovol šukhar vaš arakhipe ano dromutnipe, so amenge sito ano angluno than", phendja voj.

 

I Mihajlovićka pana mothavdja kaj Srbia mangela lošala ceremonia te leparol putaripe auto-dromesko, thaj ka akharol sa kompanije save lele kotor ano lačaripe, sar ini sa partnerjen thaj pašutne raštre.

 

 I Telopresidentka  pana mothavdja kaj Srbia ano akava berš lela te lačarol trin neve auto-dromja, kotar Preljina džo Požega, ani deonica Sremsko Rača-Kuzmin, sar ini lačaripe Moravskako koridori.

 

„Uzo odova, dži ko nilaj ka mukha ano dromutnipe ini javinako phak Koridoresko 10, vaš Bugaria, sar ini deonica Koridori 11 kotar Obrenovaci dži Preljine ano lungipe kotar 103 km. Dži decembri ka ovol gata ini deonica kotar Surčini dži Obrenovaci, a la ini ano lačaripe auto-drom Ruma-Šabac thaj sigutne dromutnipe Šabac-Loznica", klidutnindja i Mihajlovićka.