RSS

You are here

I Мihajlovićka: Kupatno akharipe Šudrorigutno Makedoniake thaj Greciake te oven kotor projektesko sigutne pruge

I Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura prof. dr Zorana Mihajlović, phendja avdive kaj delegacie Srbiaki, ThR Kinaki thaj Ungariaki avdive ano bešipe trilateralno bukjaki grupa vaš lačardipe sigutno pruga Beograd-Budimpešta vakhardile te akharen Šudrorigaki Makedonia thaj Grecia te pašarenpe ano akava projekti.

 

"Vakhardjam kotar odova kaj nane šukhar numa te ovol sigutni pruga kotar Beogradi dži Budimpešta, več kaj akava semno koridori lungara thaj te akhara e Šudrorigaki Makedonia thaj Grecia te len kotor ano akava projekti, vaš te la čačikano thaj pherdo modernizuimo sastrnalutno koridori savo phanela Budimpešta, Beogradi, Skoplje thaj Porti Pirej", phendja i Mihajlovićka, savi sine kherutni Oftoto bešipasko Trilateralno bukjaki grupa Srbia, Ungaria thaj ThR Kina vaš projekti rekonstrukcia thaj modernizacia prugaki Beograd-Budimpešta.

 

Voj phendja kaj avdive vakhardilo kotar sa so dži akana kerdilo ano akava projekti thaj so pana manglape vaš e pruga te ovol operativno na numa vaš tradipe dromutnengo, več ini vaš sa pobaro tradipe robako.

 

 "Barikane sijam so idea kotar anglo pondž berš kinake presidentosko, ungariako primijeresko thaj odolevakhtuno premijeresko Srbiako, a avdisutno presidento Srbiako, dela rezultatja save sijamen avdive, kaj bukja ano duj deonice kotar Beogradi dži  Novi Sad sigutno kerenape thaj kaj adžukhara ini ani deonica kotar Novi Sad dži Subotica te lenpe ano angluno kvartali 2020. Projekati sigutne pruge  sito kotor  globalno kinaki iniciativa "Jekh kustik, jekh drom", ama sikhavela ini partnersko ini amalikani relacia ThR Kinako, Ungariako thaj Srbiako", phendja i Mihajlovićka.

 

Voj  vakhardja kaj sa projektja save Srbia kerela e kinake kompanienca kerela ano rami e evropake standardjenca thaj kaj sa bukja musaj te ovelolen verifikaciako lil kaj kerdile ano rami odole standardjenca." Konkretikane vaš sigutni pruga šužo hraminela ano kontraktja kaj sa so kerelape musaj te ovol ano rami e evropake standardjenca, so ka kontrolišinol ulavdo notifikaciako trupo alosardo ano tenderi", phendja i Mihalovićka.

 

Vakheripa kotar rokja vaš lačardipe sigutne pruge ani teritoria Srbiaki, Mihajlovićka phendja kaj adžukharipe kinake kerdutnesko kaj bukja ani deonica Beogradi-Stara Pazova ovena agorisime pedo anglojevend  2020, a te oven verifikuime dži po agor odole beršeske. "Dujto deonica, kotar Stara Pazova dži Novi Sad, kote kerela buti rusiako RŽD, manglape prekal dinamikako plani te ovol agorisimo dži novembri 2021, thaj kaj dži po agor 2021. ovela operativno pruga maškhar Beogardi thaj Novi Sad. Ano trito deonica, Novi Sad-Subotica adžukhara bukja te lenpe ano angluno kvartali ano berš so avela, ka oven maj hari paše duj berš, a adžukhara kaj ini ungariaki rig ano odova vakhti te agorisinol bukja pedi piri teritoria", phendja i telopresidentka Thagarutnaki.

 

O Telopresidento Nacionalno komisiako vaš barjaripe thaj reforme ThR Kinako, Ning Djidže, bahtakerdja vaš labdardo adikhardo bešipe trin delegaciengo thaj pana phendja kaj avdive legardile semne vakheripe vaš lungaripe realizacia akale projektesko, savo manglape te ovol misal maškharipasko maškhar ThR Kina thaj phuvja centralno thaj javinutno Evropako.

 

"Adžukhara kaj kinake kompanie efikasno te agorisine lačardipe deonicako kotar Beogradi dži Stara Pazova, sar ini ano berš savo avela ka lenpe bukja ani deonica kotar Beogradi dži Subotica", phendja vov.

 

Pana phendja kaj ka analizirinolpe sa realacia kotar Budimpešta dži Porto Pirej, thaj lepardja kaj barjarelpe robako dromutnipe ani akaja linia kana dikhelape periodi  anglo pondž berš. "Akana sito semno kaj so trin riga čhivena zoralipe vaš te lokarenpe samatrendake procedure, soske ano pučipe semno koridori save reselape po šukhar phandipe na numa Ungariako thaj Srbiako, več ini sa regionesko", phendja vov.

 

Мinistri vaš inovacie thaj tehnologiako barjaripe Ungariako, Laslo Palkovič, phendja kaj projekti sigutno pruga Beograd-Budimpešta gndisardilo na numa vaš transporti kotar ThN Kina dži aver kotora lumiake, več sito but pobuder kotar odova. "Akate kerelape kotar odova sar te kera labdardo maškharipe e ThR Kina, ama ini te kera pošukhar  maškharipe maškhar amande ani centralno thaj javinutni Evropa. Akava projekti sito baro rezultati maškharipasko trine rigengo thaj misal vaš aver projektja ani centralno thaj javinutni Evropa", phendja o Palkovič, thaj pana phendja kaj bešipe savo avela kotar trilateralno bukjaki grupa ka adikharolpe ani Ungaria.

 

Palo bešipe trilateralno bukjaki grupa šefja delegacienge, telopresidentka Thagarutna Srbiaki Zorana Mihajlović, telopresidento Nacionalno komisiako vaš barjaripe thaj reforme ThR Kina, Ning Djidže thaj ministri vaš inovacie thaj tehnologiako barjaripe Ungariako, Laslo Palkovič, hramisarde hramisardutno bešipasko e klidutnenca kotar bešipe.