RSS

You are here

I Мihajlovićka: Lačara angluni sigutni pruga ani mesmerjavinutni Evropa

I Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj e modernizacia sastrnalutnaki ka resol e Srbia te ovol bitrujalutni ruta ini ano sastrnalutno dromutnipen thaj kaj kupatne projektja e Rusiaka sastrnalutna kerene te astarolpe odova  reso.

 

"Srbia thaj Rusia siolen na numa amalikane relacie, več ini but šukhar ekonomikano maškharipe, po ulavdipe ano umal infrastruktura. Kotar odova vakharela ini fakti kaj  kupate realizuina majbarto sastrnalutno projekti ani Evropa, lačardipe trasa kotar Stara Pazova dži Novi Sad, savi ka ovol kotor angluna sigutni pruga ani mesmerjavinutni Evropa",phendja i Mihajlovićka vaš RTS.

 

Voj dendja akcenti po odova kaj Srbiake semno te modernizuinol kompletno sastrnalutnesko Koridori 10 thaj po šukhar te phanolpe ini e Šudrorigaki Makedonia thaj Grecia.

 

"Gatisara ini neve projektja save ka kera e Rusiake sastrnalutna. Ano berš savo avela ka lelpe te lačarolpe nevo dispečersko centri ano sastrnalutni, a ano maseka save avena ka kerolpe ini projketno dokumentacia vaš lungaripe rekonstrukcia Bareski pruga, kotar Valjeva dži samatrenda e Crna Gora, kote adžukhara te lenpe bukja ano 2021.berš", phendja voj.

 

I Mihajlovićka thaj presidento Srbiako Aleksandar Vučić dikhlarde avdive lačardimasko thanutnipe viadukti Čortanovci, ani trasa Stara Pazova-Novi Sad, a ani akaja vizita sine ini krainako premieri Igor Mirović thaj ambasadori Rusiaka Federaciako ani Srbia, Aleksandar Bocan-Haračenko.

 

Bukja pi modernizacia thaj lačardipe dujkolosekeski pruga Stara Pazova-Novi Sad astarela ini lačardipe tuneli thaj viadukti Čortanovci, akava kerela rusiaki kompania "RŽD internacional", a projekti finansirinelape kotar rusiako krediti vaš modernizacia srbikani sastrnalutni.

 

Тuneli thaj viadukti Čortanovci jekh siton kotar majbare investiciake thaj infrastrukturake lačardimaske thana ano akava kotor Evropako. Viadukti ka ovol ano lungipe 2,9 km thaj ole ka akharen 59 stubja, savenda majučo ka ovol 28 metarja. Uzo viadukti, ani akaja trasa ka lačarenpe ini duj tuneleske cevja, sakoja po jekh kolosekea, lungipa 1,2 km.

 

Bukja pedo lačardipe viadukti thaj tuneli Čortanovci lelile 11. avguste 2017. Roki vaš agorisipe bukjengo sito 52 maseka, a molipe bukjako sito 337,6 milijojna dolarja.