RSS

You are here

I Mihajlovićka: Moravako koridori-angluno "digitalno" koridori, ka phanol direktno 500.000 manušen

I Telopresidentka Thagarutnaki thaj ministarka vaš lačardipe, dromutnipe thaj infrastruktura, prof. dr Zorana Mihajlović,phendja kaj Srbia lačardipa Moravako koridori kotar Preljina dži Pojate direktno ka phanol kvašo milijoni manuša ani centralno Srbia thaj sa pobare thana-Čačak, Kraljevo,Vrnjačka Banja,Trestenik,Stalać thaj Ćićevac, sar ini kaj vov ka ovol angluno "digitalno" koridori, e majmoderno sistemenca vaš vastalutnipe dromutnipa, bipokhipasko internetea thaj informacie vaš tradutne.

 

Voj mothavdja ini kaj komercialno kontrakti e konzorcijumea "Behtel-Enka" ka ovol ani thagarutni ano dešupondž dive save avena. "Amen ka startuina vakheripe e strategiake partnerea vaš klidutnipe komercialno kontrakti.Adžukhara  dešupondž dive komercialno kontrakti te kerolpe ani Thagarutni Srbiaki. Na kera khanči ko šero, definišindjam platforma vaš vakheripe savi, adžahar, ka arakholpe ani Thagarutni Srbiaki", phendja i Mihajlović.

"Te sine Thagarutni Srbiaki klidutnipa lela komercialno kontrakti, šaj te adžukhara leipe bukjengo majdur dži po agor septembaresko ano maškharipe Kruševacesko",phendja i Mihajlovićka.

 

Voj lepardja kaj Thagarutni Srbiaki alosardja strategiake partnere vaš lačardipe Moravako koridori ano lungipe kotar 112 kilometarja, savo ka phanol Koridori 10 thaj auto-drom "Miloš Veliki", thaj phendja kaj konzorciumi "Behtel-Enka" lela obligacia kaj ano roki kotar duj tekvaš berš te agorisinol auto-drom. "Odova auto-drom but pobut ka phanol andrunalipe phuvjako ze aver daj koridori dži akana thaj strategiake si semno vaš barjaripe, investicie, putaripe neve bukjake thana thaj avutnipe Srbiako", phendja i Mihajlovićka.

 

Specifika odole koridoreski, sar phendja, sitoj so raštra angluno drom lačarela auto-drom savo siole trin projekatja thaj so angluno drom pana so na lenpe bukja kerdilo logari kotar sa so šaj te kerol vaš barjaripe odole kotoresko Srbiako."Uzo lačardipe auto-dromesko, ka kerolpe ini pherdo telekomunaciako sistemi, thaj vaš odoleske akhara ole godžaver jase digitalno auto-drom pedo save ka labardinolpe sa lumiake empirie.", genela i Mihajlovićka.

 

Voj pana phenela kaj but semno vaš dizutne odole kotoresko so ka ovol regulišimo lejnako drom Moravako thaj olake lejnorengo, soske odova sito pajnalo regioni. "Sine odola problemja thaj bare pajna na numa 2014. berš, več ini palo odova, ama veke naka oven", phendja i Mihajlovićka.Auto-drom ka, pherela voj, anol dizutnenge na numa pobut investicie, već ini but pobaro arakhipe dromutnipasko.

 

I Telopresidentka Thagarutnaki adžahar ini phendja kaj šundi kotar Kruševci kaj nevo auto-drom te akharolpe "Car Lazar" thaj thagarutni ka dikhlarol bahami dizutnengo thaj ka lol odova so von mangena. "Na numa so manuša dikhena so lačarelape auto-dromja, sar ini kaj odova nane numa asfalti, več ini dikhena kaj odova auto-drom sikhavela zoralipe Srbiako, kaj barjola thaj kaj na ka ovol ulavdi kotar evropake thaj lumiake procesja", phenela telopresidentka Thagarutnaki.

 

Voj phenela ini kaj bičačikane informacie disave medijengo kaj kherutne firme na ka len kotor ano odova projekti, soske ka oven angažuime sar telokerdutne, thaj kaj strategiako partneri lela obligacia te labardol kherutne vastušeja thaj servisi thaj sa so sito kherutno hanigako.

 

I MIhajlovićka phenela kaj kherutne kompanie ka ovelolen šansa te siklon neve tehnologie save ka kerenpe ano odova auto-drom, soske ka lačarolpe ano but poaver čhandipa.

 

Prekal olake lafja,Moravako koridori ka ovol kompletno projekti, sebepi po odova so kupate ka lačarolpe auto-drom, telekomunikaciako koridori, regulišinenpe lejna thaj ka cidenpe sasave aver problemja save sine pharikerena lačardipe aver auto-dromja, po misal, Koridori 10. "Vaš odova akana sijamen jekh kotar majšukhar lumijake kompanie save kupate  amare kompanienca ka lačaren auto-drom", phendja i Mihajlovićka.

 

Lačardipe telekomunikaciako koridori lungipa auto-dromesko talohalovela majmoderno optikake thaj digitalno kablja, stanice vaš bipokhipasko vaj-faj interneti, majmoderno vastalutnipe dromutnipa ano auto-drom, sph. intiligentno transportno sistemja thaj aver, adžahar kaj saren sar akterja ka dikhen  so ovela ano drom, po misal, si mi ačavipe jase manglipe te delpe javer drom ano dromutnipe.