RSS

You are here

I Мihajlovićka thaj o Mičel kotar bilateralno maškharipe thaj infrastrukturno projektja

I Telopresidentka Thagarutna Srbiaki thaj ministarka vaš lačaripe, dromutnipe thaj infrastruktura, prof. dr Zorana Mihajlović, vakhardja avdive e komesarea vaš kinipe-biknipe Bara Britaniako vaš Evropa, Endrju Mičelea, kotar bilateralno maškharipe duj phuvjengo, regionalno phandipe thaj infrastrukturno projektja save Srbia realizuinela.

 

I Mihajlovićka naisardja Mičeleske pedo devipedumo Bara Britaniako po evropako drom Srbiako thaj legaripe reforme savenca  reslilo polačo biznis maškharipe ani Srbia. Adžahar phendja kaj si semno thanutnipe te anglunisarolpe ekonomikano maškharipe, sar ani umal infrastruktura, adžahar ini ano umal dromutnipe, kote ano akava berš ano Londoni hramisalo Halovipe kotar maškharthemutno dromesko dromutnikanipe maškhar Srbia thaj Bari Britania.  

 

“Srbia ano akava berš lela nevo investiciako ciklusi ani umal infrastruktura, ano molipe kotar pondž milijarde evrja. Akcenti vaš alosaripe projektjengo čhivdilo pedo projektja kotar regionalno semnipe soske šukhar infrastrukturno konekcie e pašutne phuvjenca semne vaš konkurencia ekonomijengo, neve investicie thaj sigutno ekonomikano baripe", phendja i Mihajlovićka.

 

Maškhar projektja savengi realizacia lelape ano akava berš sito ini lačaripe Moravskako koridori, jase auto-drom Pojate-Preljina, vaš savo hramisalo memorandumi e amerikaka kompania "Behtel", a maškhar finansijerja sitoj UK Financial Bank. "Amaro plani sito kaj akava auto-drom la te lačara ano nilaj, a vaš amenge semno soske ka phanol duj šerutne auto-dromja, Koridori 10 thaj Koridori 11, ini odova prekal regioni ano kote dživdinena paše 500.000 manuša", phendja i Mihajlovićka. 

 

 O Еndrju Mičel, savo sito angluno učo dženutno britaniako Ministribasko vaš kinipe biknipe savo vizituindja Srbia, ano vakheripe e telopresidentka Thagarutnaki, akcenti  dendja pedo interesipe Bara Britaniako vaš anglunisaripe bilateralno relacie thaj ekonomikano maškharipe duj phuvjengo.

 

"Bi dikhipa pedo pučipe phando e iklovipa Bara Britaniako kotar EU, ačhova interesuime ini vaš regioni Rjačutno Balkani ini vaš Srbia, sar ini vaš anglunisaripe amare bilateralno relacie, save ano avutno periodi manga pana te lačara, po ulavdipe ani umal ekonomia, kinipe-biknipe thaj baripe infrastrukturako. But sijam čaljarde vaš avipe UK Financial Bank ani Srbia. Akava sikhavela moderno thaj čučavno modeli finansiripe, sar vaš kapitalno projektja Thagarutna Srbiake, adžahar ini vaš biznisi privatno kompaniengo ani Srbia", phendja o Mičel.

 

Ano vakheripe lela kotor ini ambasadori Bara Britaniako ani Srbia, o Denis Kif.