RSS

You are here

Mihajlovićka: Agorisimi etapa Batrovci-Kuzmin, infrastrukturake projektja na ačhovena

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura prof.dr Zorana Mihajlović phendja, dostuipa ano Detharinesko divutno RTS-esko, kaj ano vakhti epidemiako agorisalili rekonstrukcia auto-dromesko kotar Kuzmin dži Batrovci, jase, samatrenda e Kroacia.

 

“Sa bare infrastrukturake projektja ani Srbia realizuinenape ini ano vakhti epidemia korona virusi thaj avdive ani Srbia lačarelape paše 520 kilometarja droma thaj pruge, ano save momentalno angažuime 2.600 bučarne pedo savo sim but barikani.

 

Molipe odole projektjengo sito 2,6 milijarde evrja. Dživdipe našti te ačhol, musaj te gndina ini pedo dive napal”, phendja Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura prof. dr Zorana Mihajlović. 

 

Voj vaš akaja situacia phendja kaj bukja kerenape ano disave neve auto-dromja, sar ini ano sastrnalutno dromutnipe. 

 

“Lačarelape Moravako koriodri, auto-dromja kotar Sremeski Rača dži Kuzmin thaj Ruma-Šabac-Loznica, sar ini sigutni pruga kotar Beogradi dži Budimpešta. Uzo odova, ani rekonstrukcia thaj rehabilitacia regionalno thaj lokalno droma angažuime paše 14 milje bučarne.

 

Disave etape agorisindjam, sar auto-drom kotar Batrovci dži Kuzmin”, phendja voj. 

 

Mihajlovićka phendja kaj si ini pharipe ani realizacia projektjengo.

 

“Majbaro problem te arakholpe vastušeja thaj repro-matrijali savo avela kotar aver phuvja.

 

Ka ovol pharuvipe ani dinamika ama na adžukhara baro ačhavipe bukjako. Nais lačardutnenge thaj sa kompanijenge save khuvena ano sa akala pharuvipe thaj kerena buti ano adžahar semne projektja.

 

Disave na dikhena pere familie, uč sa vakhti siton ano kampja kote kompletno organizuimo dživdipe thaj buti. Adžahar situacia sitoj, po misal, e 1.500 bučarnenge angažuime ani sigutni pruga kotar Beogradi dži Stara Pazova”, phendja voj. 

 

Telopresidentka Thagarutnaki phendja kaj arakhipe bučarnengo thaj pačavipe sa napjengo ano vakhti epidemiako ano angluno than, thaj kaj kerelape sakote buti kote si šartja vaš odova.