RSS

You are here

Mihajlovićka: Anglune avio-urjavipe 21.majea, dromutne te adikharenpe pedo sa napja

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj anglune avio-urjavipe palo čhinipe avrirndomo situacia ka ovol 21.majea, ini odova pondž urjavipe vaš Frankfurti thaj vaš Cirih, thaj kaj dromutne musaj te adikharenpe pedo sa napja save andja Thagarutni Srbia.

 

“Nikote ani Evropa nane pherdo normalizuimo avio-dromutnipe, nikote nane rndome linie, thaj adžahar ni akala na ka oven, savenca ka nakhelpe pe amare manuša save siton ani Evropa thaj mangena te inarenpe. Praktikane, pana ani Evropa nane vakhardile sar manglape te ovol drom e avionea”, phendja i Mihajlovićka dostuipa ani TV Prva.

 

Voj phendja kaj avrijalutne raštrune save avena ani Srbia musaj te ovelolen negativno PCR testi na purano pobuder kotar 72 satja, a raštrune Republika Srbiake jase odola save siolen adresa bešipaski ani Srbia jase negativno PCR testi jase nakhena ani korkoriizolacia.”Vaš amare raštrune mukhljam šaipe kaj ini te sine nakhena ani korkoriizolacia, šaj te keren testi ani referentno laboratoria thaj te sine negativno te čhinen korkoriizolacia. Palem, saren musaj ano vakhti tradipasko te akharen maske, thaj te adikharenpe ini pedo sa aver procedure”, phendja i  Mihajlovićka.

 

Kana sito lafi kotar dromesko dromutnipe, voj phendja kaj ano nakhle maseka pučipe nakhlipe samatrendako sine regulišimo ulavde mukhlipa Komisiako Thagarutnako, sova reslilo kaj anibe robako ani Srbia na ačhilo, sar ini kaj relaksiripe napjengo ini ano odova sektori ka kerolpe, sar ini dži akana, ano vakheripe e doktorjenca. “Saren amen kama samatrende te putrenpe, ini manuša ani Srbia, thaj manuša avri Srbia, ama sar sa dži akana so kerdjam godaripa, adžahar ini akana te kera thaj te adžukhara pana hari”, phendja voj.

 

Mihajlovićka phendja kaj sarjekh vaš khuvipe ani Srbia musaj te kerolpe adekvatno testi, thaj kaj odola testja kerenape ano phuvja kotar save avelape, soske manglape disavo vakhti vaš te lenpe rezultatja. Adžahar, sar phendja, ka legarolpe logari ini kotar odova kaj šaj te traden ini manuša e potikne leipa lovesko, palem kotar pokipe testesko ka oven mukhle studentja thaj bibučarne, a čhavore dži 12 berš ka oven mukhle kotar sasavo tipi testjengo.

 

Voj phendja pana kaj, ini so relaksirisale napja, saren musaj ini podur te adikharenpe amboldikano, musaj te dikhlaren distance thaj sa aver napja. “Musaj te ova amboldikane ini kana sito lafi kotar tradipe, soske pučipe sito so ka keren aver raštre. Personalno, na planirinava beršesko bešipe avri Srbiata ano akava berš”, phendja i Mihajlovićka.