RSS

You are here

Mihajlovićka ano Užice: Ano auto-drom dži Požega angluno agorisina trujalutno drom trujal Čačak

Telopresidentka Thagarutna Srbiaki thaj dženutni Preziduimeski SNS, prof. dr Zorana Mihajlović  phendja ano Užice kaj jekh kotar anglune etape auto-dromeske kotar Preljina dži Požega savi ka ovol agorisimi ka ovol trujalutno drom trujal Čačak, savo but ka lokharol drom dži Užice.

 

“E kerdutnenca bukjake ano auto-drom kotar Preljina dži Požega vakhardilam kaj paralelno e lačardipa duj tunelja save siton maj phare ani akaja etapa kerelape ini trujalutno drom trujal Čačak, soske majbut vakhti  manuša našalena ano nakhavipe prekal Čačak. Fakat sito kaj ani Srbia ano nakhle štar berš mukhlam ano dromutnikanipe 350 km auto-drom thaj me avdive but po lokhe, sig thaj sigurno alum ano Užice ze anglo numa jekh berš. A ka ovol pana po šukhar kana po agor 2021. jase ano starti 2022. berš agorisina etapa dži Požega”, phendja i Mihajlovićka vaš TV 5.

 

Voj sikhavdja pačavipe kaj ano akava berš šaj te hramina ini kontrakti kotar lungaripe lačardipe auto-drom kotar Požega dži samatrenda e  Crna Gora, etapa savi ka ovol majphari thaj majkuč, soske numa keripe tehnikaki dokumentacia sitoj paše 50 milijojna evrja.

 

Mihajlovićka phendja kaj lelape lačardipe Moravako koridori, auto-drom savo ka phanol Čačak, Kraljevo, Vrnjačka Banja, Trstenik, Kruševac  thaj Ćićevac e Koridorea 10.

 

“Vaš duj, jase trin berš ka phana auto-dromea Kruševaci e Koridorea 10, a vaš trin berš Kraljevo e  auto-dromea “Miloš Veliki”. Ini khanči tana vakharav kotar odova so kerdjam ani infrastruktura ano nakhle štar berš, dizutne odova dikhena, thaj so sito ini po semno, labarinena sa odola droma thaj rekonstruišime pruge. Vaš odova adikharava kaj ano alosaripe 26. aprilea pere avazea ka sikhaven so sa kerdjam ano nakhlo mandati”, phendja i Mihajlovićka.

 

Voj phendja  kaj ini  but aver džene anglo akaja Thagarutni Srbiaki, save akana mangena te inarenpe, sinolen sa šaipe te keren but kotar odova, ama na kerde.

 

“Saren von anglo mande sinolen šaipe te lačaren infrastruktura, sinolen kontraktja, sinolen firme…ama na kerde ni paše odoleske so amen kerdjam. Rezultatja siton odova so amen orjentišinela. Amen ano štar berš save avena ka kera pana 450 km neve auto-dromja, thaj odova phenava tumenge pherde hakajea soske pala mande si 350 km agorisime auto-dromja”, phenela i Mihajlovićka.

 

Telopresidentka Thagarutnaki pana phendja kaj raštra agorisindja kompletno Koridori 10, kaj akana sijamen auto-drom dži samatrenda e Bugaria thaj auto-drom dži samatrenda e Šudrorigaki Makedonia.

 

“Odola siton kapitalno šeja, ama na dživdinena sa dizutne uzo koridorja thaj vaš odova pana po semno so nevisardjam 550 km regionalno pruge thaj lelam rehabilitacia 5.000 regionalno thaj lokalno droma. Kera angluni sigutni pruga kotar Beogradi dži Budimpešta, avdive sijamen trin maškharthemutne aerodromja, Beogradi, Niš thaj Kraljevo. Masekesko pokhipe bajrilo kotar 330 ano pobut kotar 500 evrja a te sine adžahar lungara, vaš štare beršenge ka ovol 900 evrja”, phendja i Mihajlovićka.

 

Telopresidentka Thagarutnaki phendja kaj raštra lela vastalutnipe pedo aerodromja “Ponikve” ki Užica soske lokalno korkorodirekcia na sinola love.

 

“Amen vaš odova formirindjam firma “Aerodromi Srbije” vaš po lokhe te arakha love vaš te investirina ano po tikne aerodromja. Adžahar ka investirina love ini ano “Ponikve”, thaj na tikno lovo, sar ini kotar olesta  te kera funkcionalno aerodromi”, phendja i Mihajlovićka.