RSS

You are here

Mihajlovićka dikhlardja paluno bukjako thanipe ano javinutno khak Koridoresko 10: Anothan Sićevačko klisura, kotar novembri neve auto-dromeja

Telopresidentka Thagarutna Srbiaki prof. dr Zorana Mihajlović dikhlardja idž palune bukja ano javinutno khak Koridori 10 kotar Niš dži samatrenda e Bugaria ko Bancarevo.

 

Bukja kerenape ani trasa dži Proseko prekal Bancarevo dži Crvena reka, kote anglo tuneli Bancarevo agorisinelape galeria savi ka sanirinol kompletno puzakaripe phuvjako. Sar phenena investitorja "Koridori Srbije" thaj kerdutni kompania "Integral", sa bukja ka oven agorisime dži 31.oktobri.

 

"Sinam akate anglo duj masek kana jekh kurko bešljam ano akava kotor Koridoresko thaj akana pilta sitoj aver. Pana hari ačhilo te kerolpe thaj sar phenena "Koridori Srbije"adžukharava kaj ko leipe novembaresko ka mukha ano dromutnipe ini akaja, paluni trasa auto-dromeski ano Koridori 10", phendja telopresidentka Mihajlović.

 

Mukhlipe ano dromutnipe akaja trasa lungi 22,5 km siola baro semnipe vaš arakhipe ano dromutnipe soske tradutne ano drom kotar Niš ko Pirot thaj Dimitrovgrad veke nane musaj te nakhen prekal Sićevačko klisura, kote kerenape sine bare kolone thaj adžukharipe.

 

"Ama odova so majsemno sito kaj Srbia agorisindja Koridori 10, kaj agorisindja kotor auto-dromesko "Miloš Veliki" thaj kaj lungarela podur, ano lačardipe pana šov neve auto-dromja", phendja i Mihajalovićka.

 

Ažutno direktoresko "Koridori Srbije" Dušan Purić, sar ini šefi lačardimasko thanesko Osman Krasić kotar kompania "Integral", phenena kaj siton čaljarde bukjake tempoa ano lačardipe galeriako.

 

"Palo duj maseka kotar starti amen avdive sijam ano 75 šelestar realizuime bukja, adžahar kaj adžukharava kaj sa bukja ovena agorisime dži 31. oktobri", phendja o Purić.

 

Palo dikhlaripe lačardimasko thanipe, telopresidentka Thagarutnaki Zorana Mihajlović vizituindja Dimitrovgradi, kote olake dendilo specialno todini sebepi Dive komunako vaš sa so kerdja ano umal infrastruktura ani akaja diz.