RSS

You are here

Мihajlovićka e delegacia ThR Kinaki: Sigutno pruga Beograd-Budimpešta misal šukhar maškharipasko  

I Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura  prof. dr  Zorana Mihajlović, vakhardja avdive e delegacia ThR Kinaki, savo legarela Ning Djidže, telopresidento Nacionalno komisiako vaš barjaripe thaj reforme ThR Kina, kotar realizacia projekti sigutne pruge Beograd-Budimpešta, savo sito kotor globalno iniciativako "Kustik thaj drom".

 

I Mihajlovićka phendja kaj Srbia thaj ThR Kina siolen ulavde amalikane thaj bilateralne relacie, naisaripa maškharipasko duje presidentjengo, thaj kaj molipe momentalno kupatne projektja siton pondž milijarde evrja, dži vaš potencialno projektja planirina pana akaboka.

 

"Modernizacia sigutne pruge kotar Beogradi dži Budimpešta majsemno projekti ano akava regioni. Barikane sijam so sijam kotor globalno projektesko "Kustik thaj drom", ama sijam barikane ini po fakti kaj ThR Kina sitoj na numa ani infrastruktura, več ini ano aver kapitalno projektja thaj so amenge kinake partnerja legarena poro džandipe, empiria thaj neve tehnologie", phendja voj.

 

I Telopresidentka Thagarutnaki pana phendja kaj vaš regionalno semnipe akala prugako ovela šukhar te čhiva ini aver duj raštre-Šudrorigaki Makedonia thaj Grecia ano projekti sigutne pruge, save sine la seriozno koridori Budimepešta-Beogradi-Skoplje-porto Pirej.

 

"Strategiaki orjentacia Srbiaki sito regionalno phandipe thaj gata sijam te da devipedumo kaj akala duj raštre čhivenape ano lepardo sastrnalutno koridori. Agorisindjam dromesko Koridori 10, a agorisiriba sastrnalutno koridori ka resa ekonomikano barjaripe phuvjako thaj po šukhar standardi dizutnengo, so amenge,sar phuvjake, sito ini angluno reso", phendja Mihajlovićka.

O Ning Djidže phendja kaj relacie, maškharipe thaj politikano pačavipe maškharo duj raštre  so po intezivno thaj po šukhar, thaj kaj projekti modernizacia sigutne pruge sito but lačho misal  maškahripasko sarenenca ano regioni.

"Uzo kupatne zoralipe thaj devipedumo, lačardipe deonica sigutno pruga prekal Srbia šukhar anglunisarela. Adžukhara ano 2020 te ovol gata deonica kotar Beogradi dži Stara Pazova thaj te lelpe lačardipe trito deonicako kotar Novi Sad dži Subotica. Šukhar amenge so labardinolpe kinaki tehnologia thaj vastušeja ani realizacia akale semne projketesko. Putardo naisaripe Thagarutna Srbiako pedo zoralo devipedumo", phendja vov.

 

Bešipe adikhardilo ano rami Oftoto malavdipe Trilateralno bukajki grupa Srbia, Ungaria thaj ThR Kina vaš projekti rekonstrukcia thaj modernizacia sigutno pruga Beograd-Budimpešta, savi avdive adikharelape ano Beogradi.