RSS

You are here

Mihajlovićka e neve ambasadorea Slovačkako: But thanutnipe vaš maškharipe ani infrastruktura

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, malavdisali avdive e neve ambasadorea Slovačkako ani Srbia Fedor Rosohea thaj olea vakhardja kotar šaipe maškharipasko duje raštrengo ano sektori dromutnipasko thaj infrastrukturako, ama ini suporti Slovačkako vaš evropake integracienge amara phuvjake.

 

Telopresidentka Mihajlović mangela šukharavipe slovačkake ambasadoreske thaj phendja kaj reso Srbiako dženutnipe ani EU, sar ini regionalno maškharipe, thaj putardipe amara phuvjako vaš maškharipe ano sektori infrastrukturake projektja.

 

“Vaš Srbia sito but moldikano te ovelamen evropake standardja. Ministribe savo legarava gatisarimo sito vaš vakheribaske kotora 14 thaj 21- Transportno politika thaj Transevropako sistemi. Ano nakhle disave berša kerdjam but ani umal infrastrukturako, lačardjam 350 km neve auto-dromja. Putarde sijam vaš maškharipe, soske manga majšukhar lumiake kompanie te keren buti ani Srbia”, phendja voj.

 

Ambasadori Rosoha sikhavdja pedi principileno thaj zoralo suporti Slovačkako Srbiake pedo drom ki Evropaki unia, ama ini pedo pučhipe statusi Kosovako thaj Metohiako, phenipa kaj politika neva slovačkako thagarutnako na pharuvdisali thaj kaj Srbia thaj Balkan ačhona prioriteti.

 

“Thanutnipe vaš maškharipe si but. Nakhlam prekal procesi džendunipasko ani EU thaj amaro džandipe šaj tumenge te ovol kotar ažutipe. Kotar dujto rig, interesuime sijam vaš maškharipe ano sektori transporti thaj infrastruktura, tumen kerena but šukhar, a bi infrastrukturako nane barjaripe”, phendja ambasadori.

 

Telopresidentka Thagarutnaki dendja slovačkake ambasadoreske kilimi save kerde srbikane džuvlja ano rami iniciativako “Te čhiva pi buti 1.000 džuvlja ano ruralno regiojna” save khupate inicirinde Koordinaciako trupo vaš njamesko jekh jekhipe,  NALED thaj Etno-mreža.