RSS

You are here

Mihajlovićka e sastrnalutne firmenca kotar aktuelno projektja thaj finansijaki situacia ano vakhti epidemiako

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, adikhardja avdive bešipe e direktorjenca ano firme “Infrastruktura železnice Srbije” e Nebojša Šurlanea thaj “Srbija voz” e Jugoslav Jovićea, thaj olenca vakhardja kotar aktuelno projektja, biznisi akale firmjengo ano vakhti epidemiako, sar ini definišipe thaj agorisipe problemja ano rami e momentalno finansijaka situacia.

 

Ano bešipe sine lafi kotar realizacia infrastrukturake  projektja, e ulavde dikhipa pedo moderniripe sigutni pruga Beograd-Budimpešta, sar kotar agorisipe etapa kotar Beogradi dži Novi Sad, adžahar ini kotar starti lačardipe etapa Novi Sad-Subotica.

 

“Lafi sito kotar majbaro projekti na numa ani Srbia, uč ano mesmerjavinutni Evropa. Ministribe, sar ini dži akana, ka ovol akate te doldumo thaj ažutipe vaš realizacia te nakhol pedo kontrakteski dinamika thaj ano avutno berš ano anglojevend dži Novi Sad ka tradolpe po hari kotar kvašo sati. Kotar dujto rig, adžukarava ano angluno kvašipe avutne beršesko te la lačardipe ini trito etapa kotar Novi Sad dži Subotica, a paralelno te kerenpe ini bukja  ani rekonstrukcia regionalno prugengo”, phendja i Mihajlovićka.

 

Voj phendja kaj moldikano so sa bare projektja realizuinenape ini uzo aktuelno situacia, soske odova ka resol te adikharolpe amari ekonomia thaj olako barjaripe.

 

Direktorja sikhavde ini pedo zumavipe savenca malavdinenape, po ulavdipe kana sito lafi kotar tiknaripe avipelovengo kotar dromutnipe ani sastrnalutni, ama dende konstatacia kaj, ini uzo krizaki situacia save sitoj ani sa lumia, moldikano sito te adikharolpe niveli aktivipasko thaj likvidipe firmengo, ano savo raštra ka ažutinol.