RSS

You are here

Mihajlovićka: Investirindjam 24 milijojna evrja ani komunalno infrastruktura, Kruševaci šaj te ovol “harijalutni diz”

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, dikhlardja avdive nevolačardo sistemi mašinengo vaš šužardipe melale pajnengo ano Kruševaci thaj phendja kaj akaja diz čhivela neve standardja ani Srbia kana sito lafi kotar investiripe ani infrastruktura thaj bajo kotar uluvipe dživdipasko maškharipe.

 

“Akala mašine, save siton momentalno ano probaki buti, ka oven majmoderno ano akava kotor Evropako, a Kruševaci sar diz čhivela standardi ini vaš aver dizja kotar odova sar mangelape te legarolpe logari na numa kotar dromutnikani infrastruktura, uč ini kotar komunalno infrastruktura thaj sasto dživdipasko maškharipe”, phendja Mihajlovićka.

 

Voj phendja kaj ano lačardipe sistemi mašinengo thaj sistemi kolektorjengo lungipa pobuder kotar 60 km investirisalo sa 24 milijojna evrja, kotar programi e germaniaka barjaripaski banka KfW, a kaj pana paše 16 milijojna evrja ka ovol investirimo ano lačardipe regionalno deponia vaš zoralikano gunoj ano Kruševci.

 

“Kruševaci sito misal dizjako savo pharuvinelape thaj pakjavava kaj sa akalea so kerdilo, šaj te rodol ano avutno berš te ovol “harijalutni diz”, phendja i Mihajlovićka. Voj pana phendja kaj procesi astarela, angluno drom, ini solarno šukhibe batlakosko save palo odova labarinelape vaš produkcia energiaki, thaj sikhavela misal ekonomikano thaj ekologiako efikasipe. 

 

Telopresidentka Thagarutnaki phendja kaj ano pašipe Kruševacesko lačarelape nevo auto-drom, Moravako koridori, pedo savo kerelape buti 24 satja, ama raštra investirinela ini ano Aerodrom “Rosulje”. “Ano akava berš paše 32 milijojna dinarja reslilo vaš lačardipe thaj buti akale aerodromesko, maj angle ano lačardipe hangari, a plani sito kaj pedo oleste te investirina trujal šov milijojna evrja dži 2023. berš sar te šaj pobuder te labarina ole. Sa so investirina ani infrastruktura moldikano sito ini sebepi neve investicie, ama ini vaš odova kaj šaj manuša te ačhon te dživdinen ano Kruševci, a kaj šaj te džan ini ano aver thana ani Srbia, kaj šaj odote te keren buti, a palem te inarenpe ani piri diz savo sito barjaripasko thaj šužo”, phendja i Mihajlovićka.

 

Dizakopočekatnuni Kruševaceski Jasmina Palurović phendja avdive kaj Kruševaci ovela than kotar nakhelape ano neve standardja ano šužaripe melale pajnengo thaj uluvipe dživdipasko maškharipe. “Ano avutno periodi sa Kruševci ka ovol učhardo kolektorjenca thaj numa šužardo pani ka čhorgol ani Morava”, phendja voj.

 

Direktori Kancelariako germaniaki barjaripaski banka KfW ani Srbia, Arne Gos, phendja kaj mašine kerdili ano rami e majuče standardjenca thaj sito, uzo odova so sito majmoderno ani Srbia, ini misal vaš regioni. Vov phendja kaj ano Kruševaci ano komunalno infrastruktura investirimo paše 24 milijojna evrja, a kaj ano plani ini neve projektja, maškhar save sito lačardipe pana ofto šužardutne vaš melale pajna ano komune ani bufljardi Srbia, sar ini programi vaš anibe pajnesko thaj šužardipe melale pajnengo vaš potikne komune ani Srbia.

 

Počekatuno Rasinesko direkciako regioni, Branislav Vesić, phendja kaj investripe ani komunalno infrastruktura šarti vaš egzistiripe thaj barjaripe akale kotoresko Srbiako. “Uzo agorisipe mašinengo vaš šužardipe melale pajnengo ano Kruševci, ka kerolpe ini mašine ano Brusi thaj Blace, a sasutno investiripe ano komunalno infrastruktura ano Kruševci thaj regioni mangelape te ovol trujal 50 milijojna evrja”, phendja o Vesić.

 

Direktori JKP “Vodovod” Kruševac, Vladimir Milosavljević, phendja kaj Kruševac akale mašinenca ka ovol  ekologiako jekh kotar majlačarde thaj majmoderno dizja, savo savakhtuno ka agorisinol problem kedipe thaj šužardipe melale pajnengo.

 

Mihajlovićka ano Kruševaci anglo mašine vaš šužardipe melale pajnengo dikhlardja ini nevo aerodromi “Rosulje”, kote kerenape bukja vaš lačardipe hangaresko.