RSS

You are here

Mihajlovićka: Investiripe ano dživdipasko maškharipe thaj ekologiako šuži infrastruktura klidi vaš saslaripe ekonomiako

„Lačardipe thaj bare infrastrukturake projektja ani Srbia na ačhile nijekh momenti dži sine kriza sebepi korona virus. Odova amenge but ka ažutinol kana vakhara kotar bruto amalikano produkti thaj ekonomikano barjaripe phuvjako“, phendja avdive telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović.

 

Telopresidentka Thagarutnaki phendja kaj sa raštre lumiake cidena sebepi pandemiako korona virus thaj pedo sa note ano pučipe sitoj majbari ekonomikani kriza.

 

„Kotar dujto rig, notirisalo peripe sa gasjengo kotar efekti harijalokher, a emisia karbon dioksidesko pelo 8 dži 10 šelestar thaj avdive but raštre lumiake dikhena sar te investirinen ano dživdipasko maškharipe thaj nevisaripe haniga energiake, soske odova ka vazdol ekonomia. Ekologiaki infrastruktura ovela so pobut aktuelno thaj ano odova manglape te rodelpe klidi vaš sanacia ekonomiaki“, phendja voj.

 

Mihajlovićka pana phendja kaj ani Srbia kerelape buti pedo 520 km neve auto-dromja, thaj vaš gatisaripe projektjengo thaj stabilno budžeti nijekh momenti na sine ačhavipe bukjako.

 

„Ini ano vakhti majbaro krizako sinamen 2.500 dži 3.000 bučarne ano lačardimaske thana, akana si pobut kotar 4.000. Kerenape sa bare projektja, kotar Moravako koridori, auto-dromja kotar Preljina dži Požega thaj Sremeski Rača dži Kuzmin, palem sigutni pruga kotar Beogradi dži Budimpešta. Amaro reso sito e Srbia te phanarda dromjenca thaj te phana amare dizja“, phendja voj.

 

Mihajlovićka phendja ini kaj ano marti thaj aprili ano akava berš 4,8 milijojna automobilja nakhle Koridorea 10 thaj auto-dromea „Miloš Veliki“, so sito vaš štar milijojna po hari kana dikhelpe nakhlo berš.