RSS

You are here

Mihajlovićka: Nais bučarnenge save kerde buti ini kana sine na džanelape so anela dive, a so anela i rat

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj majbare lačardimaske thana ani Srbia na ačhile bukja sa vakhti avrirndomo situacia, thaj kaj akaja ekonomikani ranik ka ovol but semni ini vaš ekonomikano saslaripe phuvjako.

 

“Majbare lačardimaske thana ani Srbia na ačhile nijekh momenti, pedo olende kerde paše 2.500 manuša ano majbilače momentja. Idž sine paše 4.700 bučarne, a adžukhara pherdo kapaciteti ano 11 majbare lačardimaske thana, lačardipe auto-dromja, sigutni pruga Beograd-Budimpešta,  rehabilitacia dromengi  te oven paše 5.500 bučarne. Baro nais sa lačardenge save kerde buti sa vakhti ini kana sine na džanelape so anela dive a so anela rat”, phendja i Mihajlovićka dostuipa ani TV Prva.

 

Voj phendja kaj lačardipe ano urbanizmi andja ekonomikano barjaripe ano nakhlo berš thaj kaj pakjavela kaj adžahar ka ovol ini ano akava berš. “Vaš odova sito but semno so amare lačardimaske thana majbare infrastrukturake projektja na ačhile, ulavipa kotar disave aver phuvja ano regioni. Adžahar, našti te bistara kaj Srbia sitoj phuv savi ani akaja kriza khuvdja e stabilno budžetea thaj pakjavav kaj ka iklova olatar sar ini so khuvdjam”, phendja voj.

 

Voj phendja kaj ano lačardimasko than Moravako koridori paše 200 jekhutne neve mehanizacie save ale kotar regioni, kaj pedo oleste momentalno si paše šel bučarne, a bukjake divenca ini dži trin var pobut. Adžahar, sar so phendja, lačarelape ini auto-drom Sremeski Rača-Kuzmin, sar ini auto-drom thaj sigutni dromutnikani Ruma-Šabac-Loznica.”Planirina ano septembri te la bukja ini ano angluni etapa auto-dromeski Niš-Merdare-Priština, kotar Niš dži Pločnik, a planirina ini lačardipe sigutne dromutnikane ani sasti Srbia”, phendja i Mihajlovićka.

 

Voj pana phendja kaj vaš pherdo efekati lačardime infrastrukturake moldikano kaj procedure ano samatrende ovena po efikasno thaj kotar odova sebepi moldikano iniciativa vaš te kerolpe “harijalikane koridorja”. “Labdaripa vakhardilam kotar sigutno nakhavipe samatrendako e Bosna thaj Hercegovina, Šudrarigutna Makedonia thaj Crna Gora thaj pakjavava kaj uč ano nilaj te dikha rezultatja. But po phare sito halovipe kotar sigutno nakhavipe e phuvjenca save siton dženutne EU, sar so siton Kroacia, Hungaria, Rumunia thaj odova dikha te kera prekal institucie Evropake uniake. A kana vakhara kotar srbikani samatrendaki policia, odova čačikane džala so majsig thaj amen ka insistirina kaj sigutno nakhavipe ovela kotor infrastrukturako soske te na sine kaj odova kera našti te džalpe ano sigutno ekonomikano barjaripe”, phendja i Mihajlovićka.

 

Voj phendja kaj raštra ka ažutinol ini nacionalno avio-kompania Er Srbia, savako našavipe lovengo dži akan po buder kotar 40 milijojna evrja. “Našavipe ani Evropa ano aero dromutnipa sito pobuder kotar 160 milijarde evrja, but bare kompanie siton anglo bankroti. Amari “Er Srbija” siola našavipe  po buder kotar 40 milijojna evrja dži akana. Numa, amari kompania sitoj tikni, na therela love, siola 20 aviojna thaj basandune elastikani kaj šaj te adaptirinolpe. Raštra sitoj odote te kerol šartja kaj voj te kerol buti, a dikhlam ini ani akaja kriza kobor sito semno so sijamen nacionalno avio-kompania bi savi našti sine te nakhava ni baro gendo amare dizutnengo ni medicinake aparatja thaj vastušeja save sine amenge mangenape. Gndinava kaj voj ini akana šaj pana te anglunisarol, thaj ka vakhara ini kotar neve aviojna soske akana sito lačho momenti vaš odova”, phendja voj.