RSS

You are here

Mihajlovićka: Projektja e amerikake DFC-eja moldikano vaš regionalno phandipe

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj projektja kotar save vakhardilo e Maškharthemutna barjaripasko finansijsko korporacia (DFC) moldikano vaš regionalno phandipe Srbiako, sar tranzitno kombipe ano regioni.

 

“Barjaripaski agencia KAR nane akate numa disave dive, von sine ini ano februari thaj ka lungara olenca te kera buti ini ano avutno periodi, e olenga regionalno kancelaria. Molipe projektjengo kotar save dži akana vakhardjam siton trujal 3,7 milijarde evrja. Vaš angluni etapa auto-drom Niš-Merdare, kotar Niš dži Pločnik, sijamen finansiripe kotar evropikane fondja, Evropaki investiciono banka, sar ini kotar Evropaki banka vaš nevisaripe thaj barjaripe, thaj poagor oktobaresko jase leipe novembaresko adžukharelape hramisaripe maškharthemutno tenderi vaš alosaripe kerdutnengo. Vaš dujto etapa, kotar Pločnik dži Merdare, nanamen reslo finansiripe, thaj kotar odova ka vakhara paralelno e keripa dokumentacia. Adžahar, prioriteti sito ini phandipe Niš thaj Priština sastrnalutna, kote akana kotar Niš dži Merdare pampurja nakhena trianda km ano sati thaj kote trubul te kerolpe tehnikani dokumentacia”, phendja Mihajlovićka dostuipa ano TV Prva.

 

Voj akcentirindja kaj Srbia centralno phuv regioneski thaj kaj e DFC-eja vakhardilo ini kotar aver projektja save siton moldikane vaš regionalno phandipe.

 

“Vakhardilo ini kotar sastrnalutno phandipe Srbiako e Bosna thaj Hercegovina, kotar auto-drom ki Rumunia vaš savo ano avutno berš šaj te ovelamen kerdi dokumentacia, kotar sigutni dromutnikani Sombor-Kikinda savi šaj te kerol phandipe ini e Hungaria ini Rumunia. Uč avutno berš but projektja šaj te oven gatisarime, poulavdipe kana sito lafi kotar projektno dokumenatcia.

 

Pučlji vaš čhandipe finansiripe akale projektjengo, Mihajlovićka phendja kaj jekhe kotorea vov ka ovol kotar krediti, ama vakhardilo ini kotar donacie thaj tehnikano ažutipe ano keripe dokumentacia. Voj pana phendja kaj ani Srbia ano infrastrukturake projektja uč kerena majšukhar lumiake kompanie kotar Kina, Rusia, KAR thaj adžukharela kaj adžahar majšukhar lumiake kompanie te keren buti ini pedo neve projektja.

 

Mihajlovićka phendja kaj moldikano sito so ano rami maškharipasko e DFC-eja ka arakholpe ini tema džuvljikano biznisi, prekal zorakharipe amalikano godaripe kompaniengo thaj devipedumo džuvljikane bizniseske, na numa ano formiripe firmengo, uč ini ano olengo adikharipe ano periodi savo sito kritikano vaš olengo egzistiripe thaj barjaripe.