RSS

You are here

Mihajlovićka: Romnja majhačardi grupa, zero tolerancia vaš sa forme pedozoralipasko

"Thagarutni Srbiaki sitoj orjentišimi te kerol kaj sa dizutne amara phuvjake, sasavo poli, nacionalnipe jase phuripe, dživdinena ano amalipe bi pedozoralipasko, soske zero tolerancia vaš sa forme diskriminaciake thaj pedozoralipaske amaro reso", phendja avdive telopresidentka Thagarutnako Srbiako thaj presidentka Kordinaciako trupesko vaš njamesko jekh jekhipe, prof. dr Zorana Mihajlović.

 

Voj, putaripa regionalno konferencia "Khedutne te ačhava pedozoralipe prekal džuvlja" ani Palata Srbia, phendja kaj statistika bilači kana sito svato kotar pašloipe Romnjengo ano amalipe, ama odova na semninela kaj manglape te beša phande vastengo thaj na kera sa vaš te lačara situacia.

 

 "Romnja siton jekh kotar majhačarde grupe ano amalipe. Semno sito so avdive po astali saren- ini raštra thaj bithagarutno sektori, ama ini amare maškharthemutne partnerja, soske akava nane problemi jekh thagarutnako thaj jekha organizaciako. Sakodivutno mareba, kontinuirimo buti thaj kordinacia klidutne siton ano agorisipe problemjengo", phendja voj.

 

Mihajlovićka pana phendja kaj jekh kotar majbare problemja romane džuvljeno čhavorikane thaj poanglutne prandipe, thaj raštra ka pharuvinol Familiako kanuni sar akava problemi te cidol.

 

"Semno si ini te kera buti ano pharuvipe godaripe populaciako, te sikhava kaj akava nane pučipe tradiciako thaj kulturako, več si seriozno phagipe manušikane hakaja thaj forma bilačo labaripe čhajorengo", phendja voj.

 

Blerta Cela, javerutni regionalno direktorkako UN Women vaš Evropa thaj centralno Azia, phendja kaj avdive ka sikhavolpe regionalno raporti, savo ka dikhlarol po zumavipe savenca malavdinenape štar phuvja ano regioni, ama ini rekomandacie sar te nakhavenpe.

 

"Semno sito kana kreirina politike thaj napja te la ano dikhipe manglipe ini džuvljengo ini muršengo, a poulavdipe hačarde grupengo. Principi save saren amen manglape te adikharahape sito kaj khonik na ovela bistardo", phendja i Cela.

 

Mateja Norčić Štamcar, javerutni šefeski ani Delegacia EU ani Srbia,  sikhavdja pedo odova kaj Roma Thaj Romnja majbaro minoriteti ani Evropa thaj majbut diskriminišimi.

 

"Evropaki unia ka lundjarol te dol dumo zoralipenge Thagarutna Srbiake ano anglunisaripe pašloipe romana khupatnako.  Dži akana investirindjam 11 milijojna evrja, a dži po agor beršesko pana 20 milijojna evrja ano programja save ano fokusi siolen registriripe nevobijande čhavoren ano centralno pustikja, agorisipe kherutno problemi, khuvipe pi buti thaj stipendiripe čhavorengo", phendja voj.

 

Slavica Vasić kotar Romano džuvljengo centri Bibija phendja kaj akaja organizacia palune 20 berš kerela te ovel avazi Romnjengo ani Srbia thaj kaj semno sito saren te khedahape vaš te agorisina problemja romane džuvljengo.

 

"Avdive ka la kupatne deklaracie thaj rekomandacie sar bi resolpe te barjakarenpe napja vaš cidipe butrigutne diskriminacie pedo save siton Romnja", phendja i Vasićka.